မန်ဒဲလားကို ကမ္ဘာ့ခေါင်းဆောင်တွေ ဂုဏ်ပြုနှုတ်ဆက်ခဲ့ကြ

Wednesday, December 11, 2013

တောင်အာဖရိကနိုင်ငံ သမ္မတဟောင်း နယ်လ်ဆင်မန်ဒဲလားကို အောက်မေ့တဲ့ အခမ်းအနားအတွင်း နိုင်ငံတကာက ခေါင်းဆောင် ပေါင်း အယောက်ပေါင်း ၁၀၀နီးပါးတက်ရောက်ခဲ့ကြသလို တောင်အာဖရိက နိုင်ငံသား သောင်းနဲ့
ချီပြီးတော့လည်း တက်ရောက်ခဲ့ကြပါတယ်။

Johannesburg မြို့ရှိ ဘောလုံးကွင်းကြီးမှာ နိုင်ငံတကာက သမ္မတတွေ၊ ဘာသာရေးခေါင်းဆောင်တွေ၊ ဘုရင်၊ ဘုရင်မတွေပါ တက်ရောက်ခဲ့ကြပါတယ်။

ကုလသမဂ္ဂအထွေထွေအတွင်းရေးမှူး ဘန်ကီမွန်းကလည်း နယ်လ်ဆင်မန်ဒဲလား ကွယ်လွန်တာဟာ တောင်အာဖရိကနိုင်ငံအနေနဲ့ သူရဲကောင်း ဆုံးရှုံးရသလိုဖြစ်ပြီး ကမ္ဘာအနေနဲ့ ဖခင်ကောင်းတစ်ဦးသာမက ဆရာကောင်း၊ သူငယ်ချင်းကောင်း ဆုံးရှုံးရသလို ဖြစ်တယ်လို့ ပြောခဲ့ပါတယ်။

အမေရိကန် သမ္မတ ဘားရက်အိုဘားမားကလည်း မိန့်ခွန်းပြောသွားခဲ့ပြီး အဲဒီ မိန့်ခွန်းအတွင်း ဇင်ဘာဗွေ နိုင်ငံ သမ္မတလို ပုဂ္ဂိုလ်မျိုးကိုလည်း စောင်းမြောင်းပြောဆိုခဲ့ပါတယ်။

ဘားရက်အိုဘားမားက နယ်လ်ဆင်မန်ဒဲလားရဲ့ လွတ်လပ်ရေးအတွက် တိုက်ပွဲဝင်မှုကို ကမ္ဘာ့နိုင်ငံ ခေါင်းဆောင်တွေ အသိအမှတ်ပြု ချီးကျူးကြပေမယ့် သူတို့နိုင်ငံတွင်း လွတ်လပ်ရေးအတွက် ကြိုးပမ်းသူတွေအပေါ် သီးမခံနိုင်တဲ့ ခေါင်းဆောင်တွေ အများကြီးရှိတယ်လို့ ပြောသွားခဲ့ပါတယ်။

စင်မြင့်ပေါ်မိန့်ခွန်းပြောဖို့ အသွားမှာပဲ သမ္မတ ဘားရက်အိုဘားမားက ကျူးဘားနိုင်ငံခေါင်းဆောင် Raul Castro ကို ဝင်ရောက်လက်ဆွဲနှုတ်ဆက်လိုက်ပြီး ဒါကို ကြည့်ခြင်းအားဖြင့် အမေရိကန်နိုင်ငံအနေနဲ့ သူ့ရဲ့ ရန်ဖက် နိုင်ငံနဲ့ မိတ်ဖက်ပြုလုပ်လိုကြောင်း ပြသရာရောက်တယ်လို့ သုံးသပ်နေကြပါတယ်။

တောင်အာဖရိကနိုင်ငံ သမ္မတ Jacob Zuma မိန့်ခွန်းပြောကြားမယ့် အလှည့်မှာတော့ ပရိသတ်တွေက သူ့ကို ရှုတ်ချတဲ့ အသံတွေ ပြုလုပ်ခဲ့ကြတဲ့အတွက် သမ္မတ မျက်နှာကို ဆယ်တဲ့အနေနဲ့ အခမ်းအနားစီစဉ်သူတွေက choir ကွိုင်ရာဓမ္မသီချင်းတွေ အချိန်စောဝင်ပြီး သီဆိုပေးခဲ့ရပါတယ်။

တောင်အာဖရိကနိုင်ငံမှာ တပတ်ကြာ ဝမ်းနည်းကြောင်း အထိမ်းအမှတ်ပွဲတွေ ပြုလုပ်ပြီး နယ်လ်ဆင်မန်ဒဲလားရဲ့ ရုပ်အလောင်းကိုလည်း အရေးကြီးတဲ့ နေရာတွေလှည့်လည်ပို့ဆောင်မှာဖြစ်ပြီး ဒီဇင်ဘာလ ၁၅ ရက်ကြမှသာ သူ့ရဲ့ နေအိမ်မှာ နိုင်ငံတော် ဈာပနာအနေနဲ့ မြုပ်နှံ သင်္ဂြိုလ်မှာ ဖြစ်ပါတယ်။